---------------------------------------------------------------KVIZO PRI ESPERANTO EN ITALA TELEVIDO
Jxauxdon la 24an de junio 2000 la itala tutlanda televidstacio
dissendis "Speciale Mai Dire Maik": temas pri suficxe sukcesa
satirajxo, konsistanta cxefe el primokaj kvizoj.
Unu demando temis pri la piedpilka trejnisto Giovanni Trapattoni,
konata en Italio kaj Germanio ankaux pro sia fusxa parolmaniero.
La prezentisto komentis: "Trapattoni ne parolas strangan italan,
li parolas _esperanton_!" Kaj li diris esperantan frazon, tekstantan
pli-malpli: "Cologno, cxefurbo de arto kaj turismo" (en la urbeto
Cologno havas sian ejon tiu televidstacio), proponante tri italigojn,
unu gxustan kaj la aliajn amuze erarajn.
La partoprenanto tuj divenis kiu estas la gxusta italigo.
La tuto laux mi impresis pozitive. Neniu, male ol oni povus atendi,
diris ion ironian pri esperanto. Cetere la prezentisto elparolis
senerare la esperantan frazon.
Giuseppe Castelli
gcastelli@mail.enjoy.it
---
el Nova Sento - 148
